O Servizo Galego de Saúde (Sergas) retomará este martes a vacinación contra a covid-19 en residencias das sete área sanitarias coas 350 doses de Pfizer-BioNTech que quedaron de reserva do domingo, cando se forneceron as primeiras 150 a usuarios e traballadores do centro Porta do Camiño de Santiago de Compostela, das 500 remitidas polo Goberno central.
Trátase dunha decisión avalada na tarde deste luns polo comité clínico que asesora á Xunta na pandemia. Segundo sinalaron fontes da Consellería de Sanidade, este órgano aposta por “non perder un só día” no plan de vacinación, a pesar do atraso da segunda remesa de dose de Pfizer –18.000 para Galicia– que estaba prevista para chegar este luns pero que finalmente o fará o martes.
Na provincia de Lugo, a vacinación contra a covid-19 arrincará ás 10,00 horas na residencia de Burela. En concreto, recibirán a dose un total de 65 persoas, entre anciáns e empregados.
