A Universidade de Santiago de Compostela figura entre as sentinelas da seguridade alimentaria en Europa. A este eido contribúe a través da investigación, mais tamén cun compromiso directo coa Axencia Europea de Seguridade Alimentaria (EFSA). O nexo entre estas dúas institucións é Marta López Alonso, docente e investigadora do Campus Terra.
A profesora do departamento de Patoloxía Animal da Facultade de Veterinaria do Campus Terra leva máis dunha década vencellada á EFSA. E seguirá vencellada á Axencia durante os vindeiros anos, pois foi reelixida para o panel de asesoramento sobre seguridade, riscos e eficacia dos aditivos, produtos e substancias utilizadas en alimentación animal (FEEDAP).
Este grupo de expertos está formado por dezasete científicos recoñecidos a nivel europeo. Son expertos en nutrición e produción animal, toxicoloxía, farmacocinética, microbioloxía ou avaliación de risco ambiental. Entre as súas funcións están avaliar a seguridade e a eficacia dos elementos engadidos aos alimentos para a especie animal á que están adicados, nos usuarios que manexan estes produtos, e no consumidor final, así como o impacto ambiental.
Amais da avaliación destes produtos biolóxicos e químicos empregadas en alimentación animal, o panel ten por misión o control, o asesoramento e a difusión dos riscos asociados á cadea alimentaria.
A reedición de Marta López Alonso neste grupo de traballo responde á súa traxectoria como docente e investigadora neste eido, no que acreditou coñecementos na detección de elementos contaminantes en animais e na análise do metabolismo mineral.
Investigadora do Campus Terra da USC, está vencellada dende 2013 á EFSA, un órgano independente das institucións da Unión Europea e á marxe dos estados membros.
