O número de usuarios de residencias de maiores diagnosticados de coronavirus continúa en aumento e son xa 484 persoas infectadas no conxunto de Galicia, 27 máis dos que había no último balance ofrecido o venres.
Así figura nos datos actualizados este sábado pola Consellería de Política Social, que indica que 114 dos contaxios están no centro Asilo de Vilalba, intervido o xoves pola Administración autonómica, e que suma outros 3 novos positivos que o manteñen como o xeriátrico con máis casos de toda Galicia.
Dous dos novos contaxios pertencen a usuarios e o restante a un dos traballadores do centro. Desta maneira, son xa 19 os casos totais entre persoal empregado na residencia.
ATENCIÓN Á DISCAPACIDADE
En canto aos contaxios en centros de atención a persoas con discapacidade (CAPD) de Galicia, baixaron a 37, oito menos dos que había o venres ao descontarse 8 usuarios da residencia DomusVi de Bóveda que deron negativo nas probas.
Este centro conta agora con 2 casos entre os seus residentes. Ademais, a residencia San Vicente de Paúl de Lugo mantén 18 casos entres os seus usuarios.
Finalmente, baixan a 9 (un menos) os traballadores diagnosticados de COVID entre os traballadores dos CAPD: un deles en DomusVi Bóveda e outro en San Vicente de Paúl de Lugo.
