Galicia sumou 215 novos positivos nas últimas 24 horas, de modo que o número total de casos activos na actualidade é de 3.847, unha cifra esta última que supera en 105 á de onte, de acordo cos datos proporcionados este mércores pola Consellería de Sanidade, con datos da tarde de onte, martes. En Lugo seguen aumentando os casos.

A área sanitaria da Coruña e Cee segue sendo a que concentra un maior número de casos activos, 1.387, aínda que é a única na que descende este indicador, posto que aínda que se produciron novos positivos, o número de recuperados é maior, polo que son 16 casos menos activos que o martes.

O maior incremento corresponde á área de Santiago e Barbanza, onde constan 644 casos activos —37 máis que o martes–. En Lugo a subida é de 27 e o total sitúase en 786; mentres que en Ourense a cifra elévase a 362 –19 máis–; en Vigo sitúase en 269 –16 máis–; en Pontevedra crece ata os 250 –17 máis–; e en Ferrol alcanza o 149 –cinco máis–.

Na provincia de Lugo xa se levan feitas mais de 42.000 PCR. No ultimos días estivose a facer unha media de entre 600 e 700 PCR diarias

O parte deste mércores mostra que se curaron na Comunidade un total de 12.879 persoas, que son 108 máis que as que figuraban nos datos do martes. Tamén se informa de catro novos falecementos, tres no HULA e un no CHUAC, o que eleva o total de mortes con COVID-19 desde que comezou a pandemia a 648 en Galicia.