EFE | A Garda Civil abriu unha investigación para dar cos responsables dun roubo perpetrado o pasado 3 de abril en Roupar (Xermade), de onde os ladróns levaron corenta galiñas araucanas, orixinarias de Chile e coñecidas porque poñen ovos de cor azul.

Os feitos ocorreron na Finca Azureira, unha explotación avícola montada hai tres anos con galiñeiros móbiles para producir ese tipo de ovos, dado que se venden a un prezo superior ao convencional.

Segundo a información facilitada á Garda Civil, desapareceron corenta pitas, valoradas nun total de 1.600 euros polas súas propietarias. O roubo supón unha importante perda para esta explotación avícola, xa que os ladróns levaron máis da metade das galiñas que tiñan en produción.