O deputado do BNG no Congreso dos Deputados, Néstor Rego, reivindicou este xoves na cidade lucense unhas “conexións ferroviarias dignas” para o territorio, xa que esta demanda constitúe un “elemento de cohesión e vertebración social”.

Este foi o aspecto que máis destacou o representante nacionalista na súa visita á estación de ferrocarril de Lugo, que realizou xunto coa deputada no Parlamento de Galicia, Olalla Rodil, e o tenente de alcalde de Lugo, Rubén Arroxo.

Durante a xornada, presentou aos veciños da cidade o acordo ao que chegou o partido de Ana Pontón co PSOE para apoiar a investidura que facilitou o Goberno a Pedro Sánchez. O “alicerce fundamental” no que se centran é “ter Galicia como eixo único” e “conseguir unha Axenda Galega”.

Un dos puntos desta Axenda Galega é precisamente reclamar “investimentos” para “acabar as infraestruturas que están iniciadas” na provincia. “O ferrocarril está chamado a ser un dos medios de transporte que máis crecemento mostren os próximos anos”, subliñou Rego.