O pleno do Concello de Lugo deu luz verde este xoves aos orzamentos municipais para o próximo exercicio 2020, que ascenderán a 100.061.680 euros.
As contas saíron adiante cos votos a favor dos oito edís socialistas e os cinco nacionalistas. Pola súa banda, os dez concelleiros do PP opuxéronse e a portavoz de Ciudadanos, Olga Louzao, xustificou a abstención do seu grupo como un “voto de confianza”.
En concreto, estes máis de cen millóns de orzamento supoñen un 5% de incremento con respecto ás contas do pasado ano, polo que o bipartito puxo en valor a “solvencia e liquidez” tendo en conta que o concello de Lugo conta con “débeda cero desde 2017”.
Para emprego destínanse máis de 8 millóns de euros, dos que 700.000 euros irán a un programa específico para persoas en risco de exclusión social na cidade. Ademais, para mellorar o saneamento consígnase máis de 1,1 millón de euros.
A partida que experimenta un maior crecemento é a dedicada a políticas sociais, sobre 28 millóns de euros, que supón un 18% de incremento con respecto aos últimos orzamentos.
O Partido Popular censurou que estas contas son “ficticias” e que o único que busca o goberno de socialistas e nacionalistas cos orzamentos é “vender fume”.
Pola súa banda, o tenente de alcalde, o nacionalista Rubén Arroxo, que non interveu no pleno, si destacou antes da sesión que se trata duns orzamentos “axustados” ás necesidades da cidade.
Tamén antes do pleno a alcaldesa, a socialista Lara Méndez, puxo en valor “as peonalizacións” que se contemplan como a de Quiroga Ballesteros así como “o plan de fibrocemento” para “atender os problemas do día a día dos veciños”. “É un encordio cando un sofre un corte de auga, porque temos esas infraestruturas obsoletas e tamén será bo para o medio ambiente”, resolveu.
