A multinacional aeronáutica Boeing, en colaboración coa Xunta, organizou hoxe no Aeródromo de Rozas unha das xornadas ‘Drone Day’, que se enmarca dentro das actividades programadas para incentivar as vocacións no ámbito do desenvolvemento científico-tecnolóxico no Polo Aeroespacial de Galicia.
Neste acto, dirixido a alumnos de secundaria, participou a directora da Axencia Galega de Innovación (Gain), Patricia Argerey, así como a responsable do Centro de Investigación Aerotransportada de Rozas (CIAR), Neves Seoane.
Durante dez días, estudantes de secundaria de Burela, Castro de Rei, Lugo, Monforte de Lemos e Xove, fundamentalmente de 2º e 3º da ESO, participarán en sesións de cinco horas de duración, en clases cun aforamento máximo de 30 alumnos.
Patricia Argerey explicou que “a finalidade destes talleres é introducir aos estudantes, de forma dinámica e entretida, no uso e funcionalidades das tecnoloxías vinculadas aos drones, para familiarizalos coas súas aplicacións e uso”.
Lembrou, ademais, que esta iniciativa se enmarca nos compromisos asinados pola Xunta de Galicia cos seus socios tecnolóxicos no marco da Civil UAVs Initiative para fomentar as vocacións científico-tecnolóxicas entre os mozos galegos e, en especial, o interese polas carreiras STEM -ciencias, tecnoloxía, enxeñaría e matemáticas-.
Ademais do ‘Drone Day’ e das aulas ‘Newton’, organizadas conxuntamente con Boeing, a Xunta ten previsto celebrar outros talleres, charla, concursos e visitas ao CIAR para conseguir ese obxectivo.
O programa de vocacións científico-tecnolóxicas pretende chegar a máis de 1.000 escolares, máis de 100 universitarios e a case 2.000 persoas interesadas no sector aeroespacial.
