A Plataforma Feminista de Lugo insiste na necesidade de crear un xulgado especializado en violencia de xénero, unha vella demanda que conta co apoio do Concello, cuxo pleno xa aprobou por unanimidade solicitar a creación desta unidade xudicial, da que xa dispoñen outras provincias galegas.
A Plataforma criticou a “inacción do Goberno fronte á escalada de feminicidios e en especial polo triplo asasinato de Valga”, así como a “inoperancia dos grupos políticos”, que deixa ás mulleres “aos pés dos cabalos”, expostas “a seguir sendo asasinadas”.
“Mentres pasan os meses e seguimos cun Goberno en funcións, incapaz de porse de acordo en asuntos tan básicos e importantes como a Administración do Estado, as mulleres seguimos sendo asasinadas, vítimas da violencia machista“, sinala esta plataforma.
Na mesma liña, o colectivo pregunta nun comunicado “cantas mulleres teñen que ser asasinadas para que sexa un asunto de Estado e o Goberno lle dea “máxima prioridade”. A Plataforma Feminista de Lugo convocou para este mércores, a partir das 20:00 horas, unha concentración que terá lugar diante da Casa Consistorial en protesta por “a inacción” do Goberno e o triplo crime de Valga.
