O número dous da lista do PSOE, Carlos López, foi finalmente investido alcalde do municipio lucense da Fonsagrada, ao manter o BNG o seu veto sobre quen fora rexedor nos últimos 12 anos, Argelio Fernández.
O Bloque, que ten un único edil na Fonsagrada, puxera como condición para apoiar a investidura dun candidato socialista que non fose Argelio Fernández. Así, este tivo que dar un paso atrás para evitar a abstención do BNG e que se impuxese a lista do PP, que foi a máis votada, aínda que empatada a cinco concelleiros co PSOE. De todos os xeitos, Argelio Fernández, que é vicepresidente en funcións da Deputación de Lugo, mantense como concelleiro.
Tras o pleno, o novo alcalde, Carlos López, agradeceu o apoio do BNG na investidura. “Máis adiante iremos falando se é posible un pacto de goberno”, indicou. “Imos coller uns meses para avaliar a situación e non cabe descartar absolutamente nada”, agregou.
Pola súa banda, o alcalde saínte recoñeceu que as negociacións co BNG “foron de moita tensión”. “A última hora puidemos chegar a un acordo. Imos traballar en positivo pola Fonsagrada, como fixemos nos últimos anos, procurando que todo o mundo se implique en todas as cousas importantes do concello”, afirmou.
Acerca de quen o releva á fronte do bastón de mando, predixo que con el haberá “catro anos moi bos, catro anos de progreso”.
