Galicia sairá das urnas o próximo 26 de maio cun total de 3.721 concelleiros, de entre os que se escollerán aos 313 alcaldes ou alcaldesas para os outros tantos municipios, un menos que nos comicios de 2015 pola fusión entre Cerdedo e Cotobade, na provincia de Pontevedra.

A caída demográfica, sobre todo na zona interior de Galicia, é a causante de que en 21 concellos elixan 45 edís menos que nas municipais de fai catro anos, cando xa se perderon outros 45 concelleiros con respecto a 2011 (ano no que os concellos de Oza e Cesuras eran dúas corporacións independentes). Tamén na cita do próximo mes de maio haberá un concello menos, pola fusión de Cerdedo e Cotobade, na provincia de Pontevedra.

Así as cousas, o próximo 26 de maio caerán 51 representantes locais en 21 concellos, soamente compensados polo seis que soben en San Cibrao das Viñas (+2) e Foz (+4), nas provincias de Ourense e Lugo, respectivamente.

Na provincia de Lugo, onde se elixen 727 concelleiros –catro menos que os 731 de 2015, perde catro representantes o concello de Ribadeo; mentres que sobe ese mesmo número o próximo municipio de Foz. Mentres, en Xermade e en Ribas de Sil perderon dous edís cada un.