A Deputación de Lugo mobilizou na mañá deste domingo a técnicos propios e da empresa adxudicataria das obras do centro de maiores de Guitiriz, emprazado na Casa da Botica, para apontoar parte da fachada que sufriu un desprendemento.
Tal e como informa nun comunicado a institución provincial, a caída do muro ocorreu na parte dereita da fachada principal e “púidose deber presumiblemente ao forte temporal de vento” dos últimos días. Por iso, a Deputación mobilizou ata o lugar diferentes efectivos co fin de “apontoar, reforzar e consolidar” a parte desprendida.
Ademais, o goberno provincial solicitou un informe á dirección da obra, aos responsables da súa execución e á empresa encargada da construción da residencia para “determinar as causas” deste derrubamento e adoptar “todas as medidas necesarias” para que os traballos continúen “con seguridade”.
