A ANPA do CEIP de Baamonde e a Asociación de Veciños de Montenegro convocaron unha nova manifestación para protestar contra o posible peche do CEIP. Será este mesmo sábado 26, ás 17:00 horas, cando previsiblemente a vila se encha de persoas vestidas de negro para expresar a contrariedade ante a decisión do Concello de Begonte.
A marcha partirá da igrexa de Baamonde e percorrerá a estrada N-VI ata chegar á rotonda coa N-634, onde se fará unha parada para logo continuar ata chegar ao CEIP de Baamonde.
Os convocantes animan á participación de toda a veciñanza e establecementos de Baamonde, Pacios, Carballido, Vilariño, Bóveda, Pígara e Soexo, por ser os “principais damnificados” ante a pretensión do Concello de Begonte de pechar o centro educativo.