Levantan o segredo na causa sobre a morte da nena de Muimenta ao non haber “risco de destrución de probas”

As fontes xudiciais lembran que o segredo de sumario é unha medida "excepcional" que "xa non é precisa" neste caso

A casa de Cospeito na que apareceu o cadáver da nena | Arquivo

O Xulgado Mixto número 1 de Vilalba (Lugo) levantou o segredo de sumario sobre a causa da morte dunha nena de sete anos o pasado 3 de maio na vivenda familiar na que residía en Muimenta (Cospeito). Entende que “xa non hai risco de destrución de probas”.

Segundo informaron fontes xudiciais a Europa Press, o xulgado decidiu non prorrogar o segredo porque se entende que esa medida, que “sempre é excepcional”, “xa non é necesaria” nesta causa. Deste xeito, as mesmas fontes puntualizaron que “xa non existe risco de destrución de probas” e, ademais, xa se practicaron as dilixencias que o xulgado quería facer mantendo segreda a causa.

ACUSACIÓN POPULAR

Xusto este mércores 3 de xullo vén de saberse que a Fundación Amigos de Galicia decidiu presentarse  como acusación popular nesta causa. Coidan que é algo que lles corresponde como entidade por “centrar” os seus “esforzos na defensa dos dereitos dos menores”.

Por iso, a Fundación Amigos de Galicia destacou que quere “manter vivos e que non se vaian ao esquecemento co tempo os casos de malos tratos infantís”, e unha vez xulgados os mesmos, “esixir o cumprimento das penas das persoas que incorran nos mesmos”, sostivo.