O Sergas di que o predominio da cepa británica na provincia “é cada vez maior”

Unha análise de varias mostras extraídas en Guitiriz determinou que todas elas eran compatibles con esta variante.

Mostra para facer un test de coronavirus | EP

EFE | O xerente da área sanitaria de Lugo, A Mariña e Monforte de Lemos, Ramón Ares, recoñeceu que o “predominio da cepa británica é cada vez maior” na provincia, porque “non vai ser un caso aparte en relación co que sucede no resto de Galicia, de España e de Europa”.

De feito, confirmou á prensa que o Laboratorio de Microbioloxía analizou “cinco ou seis mostras de resultados positivos” en Guitiriz, un municipio que chegou esta semana a alcanzar a maior incidencia da pandemia en Galicia, e comprobou que todas eran “compatibles coa cepa británica”.

Por outra banda, explicou que, despois das medidas adoptadas, ao Sergas gustaríalle “ que a baixada da incidencia” da covid-19 na capital lucense “fose máis rápida do que o está sendo”, aínda que o número de casos activos segue minguando tamén na cidade.

Para as autoridades sanitarias, precisou, a evolución da pandemia na cidade é a que máis preocupa, porque é onde se produce unha maior concentración de poboación e o risco de que se propaguen os casos é tamén máis elevado.

En todo caso, precisa que o importante é que a incidencia vaia diminuíndo e que ese descenso xa empezase a notarse na hospitalización. A baixada no ritmo de contaxios “ten un efecto” sobre a presión asistencial e o “número de ingresos novos está a baixar desde hai unha semana”, aínda que o número de pacientes que reciben coidados na UCI segue sendo moi elevado. Ares lembrou que “son enfermos críticos” e que, por tanto, necesitan de máis tempo para recuperarse, incluso unha vez superado o coronavirus, cando “xa non son contaxiosos”.

DEIXAR UN COMENTARIO

Please enter your comment!
Please enter your name here