Nova repunta de casos na área de Lugo, onde hai 24 pacientes ingresados

Nas últimas 24 horas confirmáronse 34 novos casos logo de que onte se comunicaran só unha decena deles.

Unha sanitaria, antes de realizar un test de coronavirus no Hospital Público da Mariña | EFE - Eliseo Trigo

O total de casos activos por coronavirus na área sanitaria de Lugo segue descendendo, ao rexistrarse este mércores 16 de decembro 462 pacientes con infección activa (oito menos ca onte). Porén, segundo o reconto ofrecido polo Sergas diariamente, repuntan os contaxios. En Lugo confirmáronse 34 novos casos de Covid-19 a través de PCR nas últimas 24 horas.

En canto ás hospitalizacións, apenas hai cambios: son 24, fronte ás 26 de onte. Deles, seis pacientes seguen na UCI do HULA. Os outros están a ser atendidos en planta, distribuídos da seguinte maneira: once no HULA, tres no Hospital da Mariña e catro en Monforte.

Ademais, a provincia xa alcanzou os 140 falecidos oficiais dende o inicio da pandemia. No día de onte non se comunicou ningún deceso na área sanitaria.

Pola contra, 41 persoas recibiron a alta médica nesta última xornada, de forma que xa hai 6.082 pacientes curados. Ata o momento fixéronse 114.614 PCR (804 onte).

DEIXAR UN COMENTARIO

Please enter your comment!
Please enter your name here