O director asistencial do Sergas en Lugo: “Estamos aplanando a curva, pero hai que estar alerta”

Rafael Monte considera que a situación da provincia é "moderadamente optimista", pero advirte que as Unidades de Coidados Intensivos están preparadas por se hai novos repuntes.

Hospital Universitario Lucus Augusti de Lugo | cirugialugo.com

O avance do coronavirus en Lugo comeza a estabilizarse a tenor dos datos dos últimos días, nos que o número de infectados medrou aos poucos. Na xornada do domingo incluso se rexistrou unha baixada de casos activos por primeira vez. O director asistencial da área sanitaria de Lugo, Rafael Monte, considera que a situación “comeza a ser moderadamente optimista”, aínda que “hai que estar alerta”.

Monte destacou en declaracións a Europa Press a “estabilización do número de ingresos e o de positivos”, e mesmo considerou que o territorio está “ante un aplanamento da curva, polo menos na provincia de Lugo”.

O director asistencial do Sergas en Lugo insistiu en que a “tendencia do coronavirus é a estabilización”. Nese sentido, a provincia de Lugo non ten saturadas as unidades de coidados intensivos (UCI), aínda que si están preparados “por se hai un novo repunte da enfermidade e os pacientes necesitan ser ingresados nas UCIs”.