EFE.- O grupo municipal de Ciudadanos presentou este venres algunha das súas propostas para mellorar o transporte público na cidade, entre as que destaca a creación dunha liña circular de bus eléctrico arredor da Rolda da Muralla, a vía que constitúe unha das principais arterias de comunicación da cidade.

A portavoz do grupo municipal de C’s en Lugo, Olga Louzao, esixiulle ao tenente de alcalde, Rubén Arroxo, que convoque a Mesa do Transporte Público, “que antes reclamaba con insistencia cando estaba na oposición”, para definir as novas liñas de bus urbano.

Olga Louzao asegura que “o bus en Lugo non funciona e estase incumprindo o contrato asinado no ano 2016 coa empresa concesionaria, pagando millóns de euros en facturas con reparo de legalidade”. Para a edila é “unha prioridade” resolver “o problema do transporte público en Lugo, porque sen iso ningunha medida que se adopte en materia de mobilidade dará resultado”.

“Rubén Arroxo insistía machaconamente nesta idea cando estaba na oposición e agora é el o responsable de solucionalo“, lembra Louzao, que lle reclama “que faga o que el mesmo pedía e convoque a Mesa do Transporte Público para que as novas liñas estean en servizo á volta das vacacións no mes de setembro”.

Ademais desa implantación dun bus eléctrico na Rolda da Muralla -que serviría de intercambiador para o resto de liñas- , C’s tamén suxire crear un sistema radial de microbuses ás parroquias. EFE