A tensión entre o BNG e o PSdeG vai en aumento no municipio lucense da Fonsagrada, onde a única edil nacionalista, María Xosefa Ortiz, asegura que os socialistas non contarán co seu voto para cargarlle ao Concello dous salarios, o do alcalde, Carlos López, e a asignación parcial ao tenente de alcalde, por un importe total que supera os 64.000 euros ao ano.
É a segunda imposición de María Xosefa Ortíz tras a súa negativa a apoiar a investidura de Argelio Fernández Queipo. Isto obrigou ao ex alcalde a dar un paso atrás para permitir que a Alcaldía quedara en mans socialistas,co seu compañeiro Carlos López como rexedor local. Tras impulsar ese cambio, o BNG di agora que que non dará o seu consentimento a uns salarios que considera excesivamente onerosos para un municipio como do da Fonsagrada.
En declaracións a EFE, a edila mostrouse firme na súa decisión, porque lembra que o Concello da Fonsagrada “non pode afrontar o pago de salarios por valor de 64.000 euros ao ano cando a partida orzamentaria para investimentos rolda os 100.000 euros”. Unha nova esixencia que ten lugar xusto un día despois de que o PSdeG e o BNG tomaran posesión dos seus cargos na Deputación de Lugo, onde gobernarán conxuntamente.
“Neste concello hai moitas cousas por facer, polo que non parece de recibo que a administración local se cargue con esa masa salarial“, insistiu, e máis cando ela mesma dixo que se ofreceu para ser a primeira tenente de alcalde sen custo para os veciños da Fonsagrada, “porque ao estar xubilada non percibiría salario algún”, tendo en conta, que xa percibe o seu salario como pensionista.
O que expón o Partido Socialista, aclarou, é a contía máxima prevista para os municipios de “1.000 a 5.000 habitantes, cando A Fonsagrada ten uns 3.400 veciños”. Ortiz aclarou que o BNG lle ofreceu ao goberno local socialista, que necesita do seu voto para aprobar os salarios, a posibilidade de chegar até os 45.000 euros nas dedicacións do alcalde e do tenente alcalde, de modo que o rexedor local podería cobrar 29.000 euros anuais e deixar a cantidade restante para abonar unha asignación parcial.
