O Grupo Municipal do PP denunciou o “intento” da alcaldesa de Lugo, Lara Méndez, de “boicotear” a ‘Inauguración simbólica por encantamento’ que os populares convocaran para este mércores ás 20,00 horas na chaira do auditorio de Magoi, que segue sen uso.

Os concelleiros populares explicaron que este pasado luns pola mañá comunicouse á Subdelegación do Goberno a celebración dunha concentración de persoas na chaira do auditorio.

Pero este martes constatouse como membros de Protección Civil procedían a reparar o valado perimetral do auditorio para “tentar boicotear” a convocatoria dos populares.

Os populares cursaron unha nova petición para realizar este espectáculo de maxia diante do auditorio, co que será preciso o corte da vía pública e o desvío do tráfico pola rúa Madanela.

O PP lembra que o PSOE afirmou o mes pasado en comisión que os terreos nos que os populares querían realizar este espectáculo eran “públicos”. “Se ti entras para estar sentado alí, o Concello non de pode sancionar“, sinalan os populares que se indicou, polo que non entenden que agora se peche o valado.