Lugo contará próximamente con máis de 12.610 m² de novas zonas verdes que, repartidos en tres parcelas ofrecerán un innovador espazo axardinado nas inmediacións do Barrio Multiecolóxico que se proxecta na Garaballa ao abeiro do programa Life Lugo + Biodinámico. Así o destacou hoxe a alcaldesa de Lugo, Lara Méndez, que presentou hoxe os detalles do proxecto co que “xa se identifica a estratexia impulsada pola rexedora dende o inicio do seu mandato para transformar a cidade”.

Unha planificación que, segundo incidiu a alcaldesa, ten como obxectivo lograr unha adaptación efectiva ao cambio climático entendendo este non como unha ameaza, senón como un desafío. “A oportunidade que se nos brinda para mellorar a calidade das contornas urbanas é o eixo transversal das políticas e da acción deste Goberno non só a nivel medio ambiental senón tamén para a nosa recuperación económica”, afirmou Méndez.

A alcaldesa lucense explicou que a actuación, que sairá a licitación este próximo mércores trala súa aprobación en Xunta de Goberno, inclúe a creación de 1’2 hectáreas de terreo destinadas a zonas verdes dentro das que terán un especial protagonismo uns “novidosos hortos ecolóxicos comunitarios artellados en prol dun obxectivo fundamental: propiciar a dinamización social e aproveitar a súa capacidade terapéutica e didáctica”.