A Comisión Permanente do Consello Xeral do Poder Xudicial (CGPJ), a petición do Tribunal Superior de Xustiza de Galicia (TSXG), aprobou, polo menos durante seis meses, que unha maxistrada reforce os cinco xulgados de primeira instancia de Lugo.

Diso informou o alto tribunal galego nun comunicado, no que explica que esta medida, consistente na adscrición en réxime de comisión de servizo, con relevación de funcións, será levada a cabo pola maxistrada Cristina Sánchez Neira, titular do Xulgado de Primeira Instancia e Instrución número 2 de Caldas de Reis.

A xuíza asumirá a celebración de vistas do ci e nco unidades desa xurisdición, alternando por semanas as fixadas en cada un dos órganos, farase cargo de polo menos dous días de señalamentos á semana de cada unha das unidades. Desta maneira, celebrará, como mínimo, cinco vistas por día -tres de procedementos ordinarios e dous de xuízos verbais, excluídas as materias de familia e capacidade-. Por tanto, deberá celebrar polo menos 126 vistas ao trimestre.

Os datos de pendencia, segundo o CGPJ, “evidencian a necesidade” de adoptar a medida de reforzo. Nos últimos cinco anos os xulgados de primeira instancia de Lugo tiveron unha media de entrada de asuntos que supera en practicamente o 130% o módulo fixado polo CGPJ, que é de 1.200 casos ao ano. A finais do primeiro trimestre de 2021, a carga de traballo do número 1 excedía un 150% o indicador; a do 2, un 235%; a do 3, un 140%; a do 4, un 159%; e, a do 5, un 156%. A 31 de marzo de 2021, estas unidades tiñan 4.011 asuntos en trámite.

Estes datos, segundo o Servizo de Inspección do CGPJ, pon de manifesto “unha elevada carga de traballo, cun tempo de resposta dos órganos que oscila entre o catro e o oito meses, sen ter en conta o Xulgado de Primeira Instancia número 2, con competencia tamén mercantil”.

A dedicación de cada órgano, conforme aos datos estatísticos correspondentes ao primeiro trimestre de 2021, foi superior ao 195% entodos os xulgados, o que demostra o esforzo das oficinas xudiciais que agora se reforzan.

A medida adoptada polo CGPJ enmárcase no plan aprobado polo Gobierno para facer fronte, dentro da Administración de Xustiza, á crise derivada da COVID-19.