O proxecto ‘XuvenCiencia 2020. Fago, logo aprendo’ bota a andar este venres 10 de xaneiro en Lugo. Farao cunha sesión formativa para o profesorado de ensino medio, que recibirá nocións de innovación científica para logo trasladar ás súas aulas.
O programa XuvenCiencia, impulsado polo grupo de innovación docente homónimo da Universidade de Santiago de Compostela, cita este venres a dúas ducias de docentes no Campus de Lugo. O obxectivo é xerar unha cadea de interese pola ciencia que desemboque nos propios alumnos dos centros escolares e, así, espertar a vocación científica entre a mocidade.
KITS DE INNOVACIÓN DESENVOLVIDOS NO CAMPUS DE LUGO
As actividades desta xornada articularanse a partir de seis kits de investigación desenvolvidos no Campus de Lugo. Traballarase, así, arredor da trazabilidade alimentaria a partir de probas de ADN, a medición de proteína de leite a partir dun fotómetro móbil ou o cultivo de plantas in vitro, entre outras.
