A Granxa Experimental do sector lácteo colle forma

O primeiro centro de investigación láctea da provincia sitúase nos terreos públicos da Granxa Gayoso Castro, canda o centro de recría da Deputación

Visita institucional ás obras da Granxa Experimental do Campus Terra, na Granxa Gayoso Castro | Deputación de Lugo
Visita institucional ás obras da Granxa Experimental do Campus Terra, na Granxa Gayoso Castro | Deputación de Lugo

O Campus Terra está máis preto de ver realizado o devezo da Granxa Experimental, o tan desexado nexo entre a universidade e o sector lácteo. O primeiro centro de investigación láctea da provincia é cofinanciado pola Deputación, con 1,3 millóns de euros, e a Universidade de Santiago de Compostela, con outros 750.000. A representación institucional achegouse este luns a Castro para comprobar o avance das obras.

Durante a visita, o presidente provincial, Darío Campos, apuntou á necesidade dun centro destas características polo peso do sector lácteo en Lugo. A provincia conta con preto de tres mil seiscentas explotacións, que xeran o 18 por cento do emprego. A provincia lidera a produción leiteira en Galicia e España con máis de 1,2 millóns de toneladas anuais.

Así, a Granxa Experimental suporá “un salto cualitativo na docencia e na investigación de parte das titulacións universitarias impartidas no campus de Lugo, ligadas coa gandería e o sector primario”, en palabras de Campos. A granxa posibilitará tamén implantar un robot de muxido e probar un innovador sistema de pastoreo.

En compañía da vicerreitora do Campus Terra, Montserrat Valcárcel, e o deputado de Medio Rural, Lino Rodríguez Ónega, o presidente da Deputación asegurou que o ente provincial aposta polo “grande potencial humano” do campus lucense, onde un de cada catro grupos de investigación traballan en avances vencellados á produción láctea. Na Granxa Experimental poderán desenvolver os seus proxectos os investigadores e estudantes de Veterinaria, Enxeñería Agroalimentaria ou do Máster de Leite, para a posterior aplicación nas explotacións.

Á beira do centro de recría

USC

Campos valorou asemade a idoneidade da situación do centro de investigación, na Granxa Gayoso Castro. Con 130 hectáreas, o complexo público de Castro conta co primeiro centro de recría público de gando vacún de leite en España. Proxectado e construído pola Deputación, hogano serve a 600 novillas de 50 explotacións da provincia, dentro dunha capaacidade máxima de case 3.000 reses. O ente provincial calcula que o centro de recría, inaugurado en xuño, revertirá na provincia uns beneficios anuais de 3 millóns de euros.

Ata a entrada en servizo da Granxa Experimental, os alumnos do Campus Terra seguirán a realizar as prácticas na unidade de leite. No momento do traslado, que estaba previsto para 2018, profesionais e estudantes pasarán a Castro, mentres que a actual unidade de leite será transformada previsiblemente en nave de recría de rubia galega, en colaboración con Acruga.

O obxectivo da Deputación era estrear a Granxa Experimental en 2018 cocincidindo coa visita da European Association of Establishments for Veterinary Education (EAEVE). A comisión do organismo europeo avaliou a excelencia académica e revalidou a acreditación internacional da Facultade de Veterinaria. Logo de certos problemas coa concesionaria, a Universidade conta con estrear o centro a comezos do curso 2019/20

As instalacións do centro de investigación comprenden cinco estruturas, repartidas en 4.400 metros cadrados. Ademais das naves e silos industriais, terá espazo para 40 alumnos na aula, e 20 investigadores e docentes no laboratorio. En total, a Granxa Experimental de Leite do Campus Terra contará con 30 hectáreas no predio de Castro.

A Aula de Lácteos de Lugo potencia alimentos indicados para pacientes con cancro

DEIXAR UN COMENTARIO

Please enter your comment!
Please enter your name here