A doenza de Lyme, ou borreliose, é unha enfermidade transmitida sobre todo polos carrachos. Estes parasitos están sobre todo en pequenos roedores, que son o alimento de depredadores como raposos e lobos. Informes da Unión Europea sinalan a necesidade de ir tomando medidas. Aínda que sen estatísticas en firme, Lugo é a provincia galega que rexistra nos hospitais maior presenza da infección.
No caso de Europa, a especie Ixodes ricinus é da que máis novas se teñen sobre a súa capacidade de infección, tanto en animais como seres humanos. Este ácaro, que se alimenta de sangue logo de facer unha punción no animal ou persoa, “pode infectar o torrente sanguíneo coa bacteria Borrelia burgdorferi, que pode permanecer dentro de varias especies animais dependendo da súa fase vital”, di Martiño Nercellas, biólogo.
A borreliose pode afectar ao sistema nervioso, articulacións, pel e corazón. Era coñecido o seu carácter endémico en varios países, con baixa incidencia. As áreas máis afectadas son Europa e os Estados Unidos.
O raposo e o lobo, barreiras naturais
A Unión Europea fixo un chamado aos países membros para que adiquen máis atención á borreliose. Así, unha das recomendacións da UE é que os estados membros introduzan esta doenza como de seguemento obrigatorio. O obxectivo sería procurar un sistema de profilaxe ou prevención para as persoas con potencial risco de seren infectadas, como agricultores, traballadores do campo en xeral, e persoas de paso.
Entre as medidas propostas está a non eliminación de determinados depredadores naturais dos roedores que porten a carracha. “A intervención dos raposos á hora de controlar ás poboacións de pequenos roedores portadores de carrachos infectados por borrelia” é esencial, como sinala o biólogo Martiño Nercellas.
A supresión destes animais “é considerada moi negativamente, pois deriva nunha cadea de expansión das poboacións destes microroedores e garante a maduración de miles de larvas á fase adulta” apunta Nercellas. Este experto apunta a estudos para poboación de corzo no noroeste ibérico, incluíndo a Serra dos Ancares, nos que “detectouse unha media duns 50 carrachos por corzo”. O efecto de depredación do lobo sobre o corzo sería unha barreira fronte a expansión da enfermidade de Lyme.
