A Asociación para a Defensa Ecolóxica de Galicia (Adega) e a Plataforma Lugo de cara ao Miño realizaron este domingo a inspección bianual do Segade, tributario do Miño que atravesa a parroquia de Orbazai. O voluntariado comprobou a saúde dun treito fluvial de cincocentos metros, con conclusións positivas, aínda que advertindo o impacto negativo das estruturas artificiais sobre a vexetación.

A iniciativa é parte do Proxecto Ríos, un programa de educación e voluntariado ambiental recomendado para os cativos, no cal centos de grupos a prol do medio medio natural saen dúas veces ao ano para avaliar o estado dos ríos. Cada inspección analiza as características biolóxicas, físico-químicas, hidromorfolóxicas e patrimoniais, de cara á posterior elaboración dun informe da calidade cursos de auga doce de Galicia.

Neste caso, trátase da cuarta inspección do río Segade, correspondente á campaña de outono. Os organizadores cualifican de “éxito” a xornada, na que retiraron asemade residuos da beira do regato. O voluntariado contou con material proporcionado polo Proxecto Ríos, incluíndo fichas de identificación de flora e fauna, un Manual de Inspección Básica de Río, e reactivos químicos para a análise da calidade da auga.

Conclusións da inspección

Realizada a inspección, os colectivos ecoloxistas coinciden en sinalar que “o hábitat está ben constituído”, atendendo á calidade “moderada” do bosque de ribeira e á presenza de “especies de macroinvertebrados acuáticos que requiren moi boa calidade da auga”. A ocasión estivo condicionada por un caudal “moi superior ao habitual” por mor das choivas recentes.

Aliás, a campaña de outono certificou que “os principais problemas” do treito analizado son a “perda de continuidade e conectividade da vexetación”, circunstancias que atribúen á “instalación dunha liña eléctrica”, a estrada e a ponte. Dende a Plataforma Lugo de cara ao Miño alertan novamente contra o perigo da contaminación lumínica polo “derroche sen sentido” na instalación de luminarias. Así e todo, esta problemática é polo de agora marxinal porque os farois permanecen apagados.