O río Rato contará con paneis informativos do ecosistema

A Deputación engaderá once letreiros sobre a fauna e a flora do paseo no Río Rato, onde Equo organiza unha asamblea informativa

Paseo cardiosaudable no río Rato | Deputación de Lugo
Paseo cardiosaudable no río Rato | Deputación de Lugo

A Deputación está a renovar os paneis informativos no paseo do río Rato, no que se instalarán un total de once carteis con información sobre a flora e a fauna propios da reserva da biosfera. Dende o executivo provincial comunicaron asemade a inminente fin da instalación da nova iluminación e outras melloras executadas ao pé do paseo, cun importante tráfico. 

O deputado de Relacións Institucionais, Álvaro Santos, cualificou o paseo do río Rato coma “un dos pulmóns de Lugo, un enclave natural único que permite conectar coa natureza a escasos minutos da cidade da muralla”. As características deste paseo “único” son ideais para pasear e facer deporte, á parte de albergar unha sobresaínte vida natural. 

Este anuncio foi realizado no transcurso da ruta cardiosaudable que tivo lugar no río Rato. A alcaldesa Lara Méndez subliñou a importancia desta clase de actividades, sobre todo “nunha sociedade envellecida, tal e como acontece tanto no Concello de Lugo, onde mais do 20 por cento da poboación é maior de 65 anos”. A rexedora insistiu na aposta do goberno local por impulsar hábitos de vida non sedentarios. 

Xuntanza de Equo


A contorna do río Rato é unha das frontes da formación ecoloxista Equo, que manterá na cafetería do paseo unha asamblea informativa acerca de cuestións de medio ambiente, benestar animal e feminismo. Sectores próximos á organización alertaran do impacto sobre a biosfera da nova iluminación, un sistema redundante que pode afectar aos ciclos vitais deste importante reservorio natural.

DEIXAR UN COMENTARIO

Please enter your comment!
Please enter your name here