Concello e Xunta asinan o convenio para o centro de saúde da Residencia

O conselleiro de Sanidade e a alcaldesa de Lugo subscriben o acordo rector para a redacción do proxecto do Centro Integral de Saúde da Residencia

Concello de Lugo e Xunta de Galicia asinaron o convenio para o proxecto do Centro Integral de Saúde da Residencia. Na imaxe, Lara Méndez e Alberto Núñez Feijóo | Óscar Bernárdez
Concello de Lugo e Xunta de Galicia asinaron o convenio para o proxecto do Centro Integral de Saúde da Residencia. Na imaxe, Lara Méndez e Alberto Núñez Feijóo | Óscar Bernárdez

A Xunta de Galicia ten présa por disipar as dúbidas xurdidas arredor do plan de renovación do barrio lucense da Residencia. O retroceso deliberado do goberno galego nos trámites administrativos non afecta os usos sanitarios, polo que o buque insignia deste proxecto segue avanzando. E a proba deste movemento é a sinatura do convenio para a construcción do Centro Integral de Saúde.

De realizarse, sería o primeiro centro desta clase en Galicia, e a estrea dun modelo de atención unificada que entusiasma á Xunta. Logo de trascender a anulación da retrocesión dos edificios da Residencia, o executivo autonómico pisou o acelerador. O presidente Alberto Núñez Feijóo deu orde de apurar os anuncios previstos para Lugo, que inclúen o centro de emprendemento aeronáutico, e aumentou considerablemente a súa presenza na provincia, con tres visitas en seis días.

Nesta liña prodúcese a sinatura do convenio de colaboración entre a alcaldesa de Lugo, Lara Méndez, e o conselleiro de Sanidade, Jesús Vázquez Almuiña, estabelecendo as bases para a redacción e execución do proxecto do Centro Integral de Saúde da Residencia. As instalacións ocuparán o vello Hospital Materno Infantil, e comprenden o centro de saúde con Punto de Atención Continuada, a unidade de saúde mental e a base do 061.

A dotación pública cumpre cos usos contemplados no Real Decreto de 1990 e tan só depende dos trámites patrimoniais e urbanísticos. O goberno local comprometeuse a facilitar a documentación previa á execución das obras, asumindo os gastos de dotar as parcelas das infraestruturas e servizos públicos –accesos, abastecemento, saneamento, subministración de enerxía, alumeado, telefonía, etc.–.

Así mesmo, o Concello eximirá de pagamento do IBI a favor da administración autonómica durante o tempo que dure o convenio, bonificando ata o máximo legal o imposto sobre construccións. A cambio, o Sergas elaborará o proxecto técnico e executará as obras na Residencia con cargo o orzamento da Xunta.

2 COMENTARIOS

DEIXAR UN COMENTARIO

Please enter your comment!
Please enter your name here