O Ministerio de Transportes, Mobilidade e Axenda Urbana dedicará un investimento superior a 294.000 euros para a recuperación da contorna da igrexa de San Xulián do Camiño, no concello de Palas de Rei, segundo anunciou a subdelegada do Goberno en Lugo, Isabel Rodríguez.
Esta iniciativa enmárcase no programa de actuacións do Goberno de Pedro Sánchez en apoio do Camiño de Santiago, segundo informou a subdelegada.bNeste caso, as obras teñen por obxecto a revalorización do conxunto formado pola igrexa e o seu cemiterio. Con esta intervención, trátase de prolongar a pavimentación existente na zona central do núcleo ata o ensanche do Camiño.
O proxecto tamén inclúe o soterramento das instalacións urbanas e a dotación dunha iluminación máis discreta que evite o impacto visual das actuais luminarias. As obras foron adxudicadas na cantidade de 294.587 euros á empresa Vipeca Obras e Servizos.