A antiga residencia da Compañía de María está xa en obras. Logo da adquisición do edificio por parte da sociedade de restauración Oktonal, administrada polo empresario local Dámaso Expósito, comezou a xestarse a idea dun hotel de catro estrelas na avenida Ramón Ferreiro. Ano e medio despois, o compromiso é firme: oito millóns de euros de investimento para un complexo de 90 habitacións e unha ampla zona verde, que abrirá a finais de 2019.
O proxecto correspondeu a envergadura do plantexamento inicial por medio do acordo coa multinacional francesa AccorHotels, que opera 4.200 hoteis e 10.000 residencias de luxo nun cento de países. Finalmente será a marca Mercure a responsable do complexo, coa vista posta en aproveitar o potencial do eido gastronómico en Lugo.
Con catro estrelas e noventa habitacións, o novo hotel da avenida Ramón Ferreiro presumirá tamén dun excepcional xardín. Esta iniciativa hostaleira, que incluirá un aparcadoiro público, dará emprego directo a un equipo de 30 persoas. Se os prazos de construcción non sofren alteracións, os responsables agardan que a inauguración se produza antes de que remate 2019.
Na presentación do hotel compareceron o propio Dámaso Expósito, de Oktonal, o CEO de AccorHotels no sur de Europa, Jean-Charles Delgado, a xefa provincial do servizo de Turismo de Galicia, Paloma Vázquez, o presidente da Deputación de Lugo, Darío Campos, o delegado territorial da Xunta de Galicia, José Manuel Balseiro, e a alcaldesa Lara Méndez.
O representante do goberno autonómico avanzou o comportamento positivo da demanda hoteleira na cidade de Lugo durante o primeiro semestre do ano. A cifra de viaxeiros aloxados aumentou un 8,4 por cento e o volume de noites un 1,7 en termos interanuais. “É o cuarto ano consecutivo no que se observa unha mellora dos niveis de demanda en Lugo no conxunto dos primeiros seis meses do ano –confirmou Balseiro–, circunstancia que eleva o volume final a 131.000 noites”.
