O número de infectados por COVID-19 na área sanitaria de Lugo sufriu un repunte nas últimas horas, con 82 novos contaxios confirmados para un total de 371. Segundo datos da Consellería de Sanidade, o balance de falecidos en Lugo mantense en sete.
Do total de pacientes por coronavirus na provincia, doce permanecen na UCI (catro na do Hospital Público da Mariña e os outros oito na do HULA). Outros 68 doentes están hospitalizados (16 na Mariña, nove en Monforte, dous nos Ollos Grandes e os demais no HULA). Os 291 diagnosticados restantes atópanse no seu domicilio.
En canto aos casos activos en Galicia, o Sergas contabiliza 3.758, 282 pacientes máis ca na xornada de onte. Ata o día de hoxe, rexistráronse 187 altas na comunidade e 94 mortes de persoas co virus.
Deses casos rexistrados, 817 corresponden á área sanitaria da Coruña; 520 á de Ourense; 366 á de Pontevedra, 928 á de Vigo, 547 á de Santiago e 209 á de Ferrol.