O xulgado do contencioso-administrativo nº2 de Lugo confirma a sanción administrativa de 50.000 euros ao Club Atlético Osasuna por regalar entradas aos seus ultras para asistir a un partido en Lugo. Daquela, desestímase o recurso interposto polo Osasuna e ratifícase a resolución ditada pola Subdelegación do Goberno de Lugo en novembro de 2016.
Os feitos foron considerados como infracción grave relacionada coa violencia, o racismo, a xenofobia e a intolerancia no deporte. Na sentenza, a xuíza indica que a proba incluída no expediente sancionador “evidencia que o Osasuna facilitou, ben directa ou indirectamente, ao grupo radical Indar Gorri entradas de cortesía para asistir ao partido contra o Lugo”, celebrado o 5 de marzo de 2016 no Anxo Carro.
A maxistrada tamén destaca no fallo que se acreditou que ambos clubs “asinaron unha semana antes do encontro un documento” no cal o Osasuna se comprometía a non facer entrega dos pases a “grupos problemáticos ou con antecedentes violentos”.
Ambos equipos recoñecen que o Osasuna recibiu naquel momento 75 entradas de cortesía do Lugo, que deberían ser destinadas, segundo o acordo subscrito, “única e exclusivamente para atender compromisos da entidade, consello de administración, xogadores e patrocinadores, non podendo ser utilizadas por grupos problemáticos ou colectivos que teñan antecedentes violentos”.
Con todo, durante o partido detectárase a presenza dunha vintena de afeccionados da peña Indar Gorri na zona reservada para as entradas cedidas ao club visitante.
Á hora de rexeitar o recurso, a xuíza subliña que a entidade deportiva, nas súas alegacións, “non desvirtuou estes feitos, dado que recoñece recibir 75 entradas do Lugo e entregar algunhas a persoas non identificadas”.
