No Hospital Universitario Lucus Augusti (HULA), un cartel multilingüe roga silencio nunha chea de idiomas, pero ignora o galego. A situación está a ser duramente criticada nas redes, logo de que unha paciente compartira no Facebook unha foto do letreiro a modo de denuncia pública.
O cartel aparece encabezado cunha frase en castelán: “Se ruega guarden silencio”. Séguena traducións ao inglés, alemán, euskera, catalán, irlandés, sueco ou árabe, entre outras. Para pechar o cartel, repiten a orde en castelán. Nin rastro do galego.
“A ausencia total de dito cartel na outra lingua cooficial de Galiciae a repetición da mensaxe en castelán, ao comezo e ao final da mensaxe non pode ser máis que intencionada, negar a lingua histórica de Galicia“. Así o denunciaba Ánxela Gracián, escritora e tradutora de Castroverde, de cuxo perfil de Facebook partiu a publicación viral no día de onte, 31 de xullo. Deseguido, as redes enchéronse de mensaxes de indignación ao ver como un hospital público galego ignora a lingua de noso dunha forma tan evidente.
Tamén A Mesa pola Normalización Lingüística se fixo eco desta situación. “O SERGAS pertence á Xunta, que -máis unha vez- non só abdica da súa responsabilidade de protexer a nosa lingua, senón que é precisamente quen máis vulnera os nosos dereitos“, reprobaron ao respecto.
