A Consellería de Medio Ambiente, Territorio e Vivenda reforzará a retirada de niños de velutina nunha vintena de concellos con superficie en Rede Natura. Entre eles hai dous concellos chairegos parte da Serra do Xistral, Muras e Abadín.
A responsable do departamento autonómico, Ángeles Vázquez, trasladou á Agrupación Apícola de Galicia (Agrupación para o Desenvolvemento e Formación do Sector Apícola Galego) que no 2019 serán prioridade estas accións nas zonas naturais protexidas, co obxectivo de “conter a proliferación da vespa asiática”.
Na provincia de Lugo, a Xunta de Galicia tamén reforzará a retirada dos niños en Chantada, Sober, Samos, Viveiro e Ribadeo.
Monfero, San Saduniño, A Capela, Melide, Toques, Santiso, Calvos de Randín, Trasmiras, A Lama, Bueu, Cangas, A Illa de Arousa e Silleda son os outros municipios que se verán beneficiados pola campaña, xunto coa e o Parque Nacional Illas Atlánticas.
Proxecto Positive
Vázquez fixo fincapé na necesidade da colaboración cidadá para a localización dos niños e lembrou que a Xunta participa no proxecto Positive, unha iniciativa para o intercambio de experiencias e coñecementos para o control desta especie entre os países do sudoeste europeo.
O proxecto, cun orzamento de case dous millóns –con financiamento nun 75 por cento do fondo europeo de desenvolvemento rexional FEDER–, promove a transmisión de coñecemento e experiencia dos socios máis experimentados, como Francia, aos que levan menos tempo convivindo coa especie, como España e Portugal.
