A Deputación acadará novos ingresos para os concellos de Lugo coa aplicación de taxas ás empresas enerxéticas pola ocupación de espazos públicos municipais. Este luns asinouse o convenio entre a autoridade provincial e 51 municipios para iniciar os traballos preliminares, nun proxecto sen precedentes na provincia. O gravamen suporá un ingreso adicional para as administracións locais que, esperan, redunde tamén en beneficio para as compañías subministradoras de enerxía.
O presidente da Deputación, Darío Campos, explicou que en primeiro lugar contratarase un estudo para determinar o espazo público ocupado polas empresas de luz e gas. O rexistro técnico e xurídico permitirá establecer as taxas correspondentes polo transporte de enerxía en cada termo municipal. O resultado recollerase nunha ordenanza que aprobarán os concellos para a súa aplicación, comezando así a percibir estes novos ingresos.
Malia ser unha iniciativa novidosa na provincia de Lugo, hai exemplos en España e tamén en Galicia que avalan esta liña impositiva ás enerxéticas. Así, Campos explicou que “en Arteixo están a traballar neste eido tralas sentenzas favorables do Tribunal Supremo sobre a regulación de taxas ás eléctricas mediante ordenanzas municipais”.
A Deputación destinará a este proxecto uns 130.000 euros. Os concellos asinantes colaborarán cos axudas de entre 3.000 euros e un máximo de 6.000, en proporción á lonxitude das liñas eléctricas coas que conten. O custo para o conxunto do proxecto é de 256.000 euros.
Os 51 concellos que colaboran da Deputación son Abadín, Alfoz, Baleira, Baralla, Barreiros, Becerreá, Begonte, Bóveda, Castroverde, Cervantes, Chantada, O Corgo, Cospeito, Folgoso do Courel, A Fonsagrada, Foz, Friol, Guitiriz, Guntín, O Incio, Láncara, Lourenzá, Lugo, Mondoñedo, Monforte de Lemos, Muras, Navia de Suarna, Negueira de Muñiz, As Nogais, Outeiro de Rei, Palas de Rei, Paradela, O Páramo, A Pastoriza, Pedrafita do Cebreiro, A Pobra de Brollón, Pol, A Pontenova, Portomarín, Quiroga, Ribadeo, Riotorto, Rábade, Sober, Taboada, Trabada, Triacastela, O Valadouro, O Vicedo, Viveiro e Xermade.
O goberno da Deputación, dende a Área de Cooperación dos Concellos, elaborou un estudo previo que recolle as tipoloxías de liñas eléctricas coas que contan os Concellos, e a lonxitude de ocupación das liñas de tendidos eléctricos sobre os bens de titularidade pública municipal. Unha empresa especializada, a que resulte adxudicataria do proceso aberto a todas as entidades interesadas que se publicarán nos vindeiros días no Boletín Oficial da Provincia, elaborará o inventario de ocupación e aproveitamento do dominio público municipal de toda a provincia.
Sentenza favorable do Tribunal Supremo
O Tribunal Supremo de Xustiza ditou varias sentenzas favorables sobre ordenanzas similares nos municipios de Arteixo (A Coruña), Serradilla (Cáceres) e Villalcampo (Zamora). As sentenzas aceptan “a valoración dos devanditos Concellos das liñas eléctricas e as canalizacións como construcións a efectos de cálculo da base impoñible da taxa por utilización do dominio público”.
Sobre iso, o alto tribunal recolle que “non se trata de gravar un chan rústico de uso agropecuario, senón a utilidade que lle reporta ao suxeito pasivo a utilización privativa ou o aproveitamento especial do mesmo, con exclusión dos demais, para unha actividade netamente industrial consistente en transportar e distribuír enerxía eléctrica”. Por iso considera que unha taxa ás enerxéticas é “de todo punto axustada ás esixencias legais”.
