Continúa a guerra do leite aberta polos agricultores galegos que protestan contra os baixos prezos compensados polas industrias asentadas da Comunidade. Das tractoradas e o vertido de produto da rúa pásase agora ao boicot que o Sindicato Galego Labrego vén de pedir con respecto ás industrias de Lactalis, unha das plantas máis sinaladas polos produtores nas últimas semanas.

A formación sindicalista vén de lanzar unha campaña de denuncia e boicot “das marcas que máis están a prexudicar ás granxas galegas”. Sinala, neste aspecto, que as empresas apuntadas “se negan a pagar o litro de leite a prezos que cubran os custos de produción”, cada vez máis elevados pola crise de combustibles e materias primas, que afecta tanto á luz como aos fertilizante.

“Galiza é a maior produtora de leite do Estado, cun 39,1 % do total de entregas, moi lonxe da súa inmediata seguidora, Castela e León, cun 12,5% (Observatorio da Cadea Alimentaria, 2021). O sector leiteiro é esencial económica e socialmente no noso país, e no Estado”, destacan dende a plataforma. Porén, enganden, os produtores galegos estarían a atravesar dificultades pola “política de brazos cruzados” da Xunta de Galicia, á que acusan de non convocar mesas bilaterais máis alá dunha vez ao ano.

A convocatoria de boicot nace así como resposta á situación de “absoluto abandono administrativo” con respecto ás granxas máis pequenas, que de acordo coas mesmas fontes se verían empurradas á quebra. Entre as empresas sinaladas, destacan a multinacional francesa Lactalis-Puleva, á que cualifican como “a empresa do sector lácteo que máis factura na UE” e que recolle “máis do 20% do leite producido en Galicia”.

“O prezo do leite no supermercado subiu, e seguirá subindo, pero aos gandeiros e gandeiras non nos trasladan nada desa subida que sufrimos como consumidoras. Empresas como LACTALIS están acaparando o valor engadido do traballo das granxas de leite. Provoca así a destrución do tecido produtivo galego, forzando a ruína de milleiros de granxas galegas, especialmente as máis pequenas, que son as máis beneficiosas en canto a fixación de poboación”, destacan.

Please wait while you are redirected...or Click Here if you do not want to wait.