Dous mozos protagonizaron este martes na Audiencia Provincial de Lugo un altercado no xuízo que se ía a celebrar contra eles por un delito de agresión sexual, ao mostrar a súa desconformidade coa defensa do seu avogado de oficio.
A vista tivo que ser suspendida antes do inicio por “desavinzas” co letrado, que, segundo explicaron, lles propuxera un acordo de conformidade que eles non quixeron aceptar.
Ambos foron chamados polo tribunal, que lles preguntou polas razóns para pedir o cambio de avogado, e os dous mozos explicaron que o seu avogado “quería vendelos”, que eran inocentes e que ata o día anterior non se puxo en contacto con eles.
Durante as preguntas sobre a causa do cambio de avogados e a pesar das explicacións da presidenta da sala, insistiron na súa inocencia, algo que non se estaba tratando, e reclamaron á xuíza que os deixase sen cargos. Tras unha explicación sobre os procedementos legais establecidos, cos dous acusados moi alterados, acabáronos citando para unha nova vista no mes de outubro, nesta ocasión defendidos por avogados privados.
O Ministerio Fiscal solicita para ambos unha pena de cinco anos de prisión por agresión sexual a unha menor de 18 anos, uns feitos que tiveron lugar á saída dun pub de madrugada. A vítima declarara que ambos lle tocaron as súas partes íntimas cando ela saía do local entre máis xente.
Esta pena de cárcere leva aparellada outra de afastamento por un tempo de sete anos, a súa inhabilitación especial para calquera profesión ou oficio, sexa ou non retribuído, que leve contacto regular e directo con menores de idade durante 10 anos e seis meses e a pena de liberdade vixiada cunha duración de oito anos.
Tamén se propón que cumpran a metade da condena e que sexan expulsados do país durante dez anos, ademais de indemnizar á vítima con 3.000 euros por danos morais.
