A Deputación informa do corte ao tráfico da estrada provincial LU-P-4103, ao seu paso polo concello de Pantón, como consecuencia do derrube de terra dunha ladeira provocado polas intensas chuvias rexistradas nos últimos días.

O desprendemento produciuse no quilómetro 12 desta vía, que comunica Ferreira de Pantón co encoro de Santo Estevo, o que obrigou a interromper a circulación para garantir a seguridade dos usuarios. Tras ter coñecemento do incidente, a institución provincial desprazou á zona persoal técnico e maquinaria co obxectivo de avaliar a situación e iniciar os traballos necesarios para a retirada do material desprendido e a estabilización da ladeira afectada.

Mentres non se restableza a normalidade na circulación, a Deputación habilitou itinerarios alternativos debidamente sinalizados, ao tempo que solicita á veciñanza e ás persoas usuarias da vía que extremen a precaución e respecten a sinalización provisional instalada.

Por outra banda, como consecuencia dos efectos do episodio de chuvias intensas, continúan pechadas ao tráfico varias estradas da rede provincial. En concreto, permanecen cortadas por asolagamentos a LU-P-3204, no concello de Monforte de Lemos; a LU-P-4703, na Pobra do Brollón; e a LU-P-0901, en Bóveda. Así mesmo, seguen intransitables o tramo vello da LU-P-3501, en Navia de Suarna, e a LU-P-6502, no concello de Muras, debido aos danos ocasionados pola auga en dúas pontes.

A Deputación mantén un seguimento permanente da situación e continúa traballando para recuperar a circulación nestas vías no menor tempo posible, sempre que as condicións meteorolóxicas e de seguridade o permitan.