A Policía Local de Lugo informou este xoves de que interveu na madrugada do 7 de outubro unha bicicleta, tras denunciar ao home que a conducía por circular en sentido contrario.

Os feitos producíronse na Rúa Quiroga, onde o condutor foi identificado e denunciado por unha infracción á normativa de tráfico, tras darlle o alto por ir en sentido contrario.

En todo caso, a situación chamou a atención dos axentes non só pola súa conduta na vía, senón polo “rechamante” cartel manuscrito que levaba encostado á bicicleta: “Bicicleta de uso público. Instrucións: usala, coidala, depositala en novo destino”, ademais dun código QR.

Preguntado polos axentes, o ciclista manifestou que non era o propietario da bici, senón que a collera momentos antes dun portal próximo a un locutorio, e que a súa intención era “dar unha volta e deixala despois onde a atopou”.

DELITO LEVE CONTRA O PATRIMONIO

A bicicleta, da marca RockRider e en aparente bo estado, foi intervida e trasladada ás dependencias policiais, para localizar ao seu lexítimo propietario.

Así mesmo, informouse o home da comisión dun suposto delito leve contra o patrimonio, ao facer uso dun ben alleo sen contar con consentimento algún.

A Policía Local de Lugo lembra á cidadanía que ningunha bicicleta é de “uso público” se non pertence a un sistema autorizado de aluguer ou préstamo municipal, e que apropiarse dunha bicicleta atopada na vía ou en zonas comúns pode ter consecuencias legais.