A Policía Local de Lugo prestou asistencia o pasado sábado nunha vivenda da capital a unha muller presuntamente agredida pola súa parella no domicilio de ambos, que tras notificar a agresión mediante unha chamada ao 092 e gravar os feitos co seu teléfono móbil negouse a interpor denuncia por violencia de xénero.

Os feitos tiveron lugar, segundo precisou a propia Policía Local nun comunicado, ás 23:50 horas da xornada do sábado nunha vivenda da Rúa das Fontiñas, ata onde se trasladou unha unidade do Grupo Operativo Nocturno tras ser requirida pola vítima.

A muller, que se atopaba, apunta o comunicado, en evidente estado de nerviosismo e que presentaba arañazos á altura do peito, acusou o seu compañeiro sentimental e pai da súa filla, que se achaba presuntamente en estado de embriaguez, de insultala e agredila durante o transcurso dunha discusión.

A demandante, que gravou a agresión co seu teléfono móbil chegando mesmo a mostrar o contido das imaxes aos axentes, negouse con todo a entregar a estes o material audiovisual nin a recibir asistencia sanitaria. Tamén rexeitou a posibilidade de presentar denuncia contra a súa parella aínda que se iniciou unha investigación para localizar ao agresor por un presunto delito de violencia de xénero.