O Xulgado de Instrución número 1 de Lugo decretou este venres prisión provisional comunicada e sen fianza para o profesor do CEIP Albeiros de Lugo detido o mércores como presunto autor dun delito continuado de agresión sexual a polo menos oito das súas alumnas con idades comprendidas entre o oito e o dez anos.

Tras pasar dúas noites no calabozo, o docente, sobre o que pesaban polo menos unha decena de denuncias interpostas pola contorna das nenas ante a Unidade de Atención á Familia e Muller (UFAM) da Policía Nacional, chegou ás dependencias xudiciais ao redor das 14,30 horas. Logo dunha longa comparecencia ante a xuíza, que se prolongou durante case catro horas, a titular do Xulgado de Instrución número 1 acordou a prisión provisional do investigado, que se atopaba de baixa médica no centro educativo desde o luns.

PROHIBICIÓN DE APROXIMARSE A DEZ MENORES

Tamén determinou este venres a maxistrada, en base aos indicios achegados, a prohibición para o investigado de aproximarse a dez das menores presuntamente prexudicadas a menos de 500 metros e de comunicarse con elas, así como de aproximarse igualmente ao centro educativo no que impartía clase, no caso de saír de prisión. Tampouco poderá exercer o profesor lucense, de acordo ao auto redactado pola xuíza, e profesión algunha que supoña contacto con menores mentres dure a instrución da causa.