A Asociación Profesional de Funcionarios de Prisións (Apfp), sindicato maioritario no Centro Penal e na provincia de Lugo, informou dunha agresión dun preso a dous funcionarios no cárcere de Monterroso (Lugo) este venres día 20 de outubro.

Segundo o relato, cando o xefe de servizos e tres funcionarios procedían ao cacheo dun interno e unha requisa na súa cela, o encarcerado empezou a insultalos e facer espaventos” coas mans, “moi alterado e en actitude moi agresiva”. Deste xeito, “foi elevando o ton dos insultos pasando ás ameazas e patadas e puñadas aos traballadores”.

No intento de redución do preso, foi cando resultaron lesionados os dous funcionarios. Un deles nas costas cunha forte contractura lumbar, tendo que ser trasladado á enfermaría do centro. O outro recibiu atención médica e calmantes para mitigar a dor nas costelas. Este interno cumpría unha sanción de illamento en cela polo seu “mal comportamento, con numerosos informes previos de perigo e numerosos partes e mala conduta”.

Posteriormente, o interno manifestou tragarse unha coitela, polo que foi derivado ao hospital. O sindicato destaca a “profesionalidade” dos funcionarios, que evitaron máis dunha vez que se teña que lamentar “unha desgraza” e tamén destacou a actuación do equipo directivo, incluído á hora de afrontar os feitos.

O sindicato desexa unha “pronta recuperación” aos funcionarios que sufriron lesións e lembra que o centro de Monterroso ten categoría C, polo que debería albergar internos de perfil baixo, pero “a realidade é ben distinta”.