A Policía Nacional de Lugo detivo a dúas persoas relacionadas coa venda de heroína dando por desarticulado un punto de venda de drogas na cidade. Segundo confirmou a Policía, trátase dunha parella de mediana idade.
Ao home, ademais dun delito contra a saúde pública, impútanselle os delitos de ameazas graves e contra a seguridade do tráfico, xa que no momento de proceder á súa detención tratou de fuxir “pondo e perigo aos axentes que interviñeron, así como ao resto dos usuarios da vía”. Finalmente, foi interceptado sen consecuencias.
A investigación iniciouse tras a denuncia dos cidadáns e comerciantes da zona da rúa Tino Grandío que manifestaron a circulación pola zona de persoas alleas ao barrio.
Posteriormente, localizouse aos implicados e foron detidos. Ademais, a Policía detallou que se lles incautaron varias doses de heroína, pastillas e haxix en cantidades preparadas para a venda, así como diñeiro en metálico proveniente das vendas realizadas.
