A Garda Civil imputa en calidade de investigado a un veciño da localidade lucense de Becerreá como presunto autor dun delito de estafa e outro de furto por realizar unha revisión fraudulenta de gas nunha vivenda na que, ademais, subtraeu diñeiro. Segundo informou o Instituto Armado, os feitos delituosos tiveron lugar o pasado mes de setembro no termo municipal do Corgo, no cal o investigado realizou unha suposta revisión de instalación de gas.

A Benemérita resaltou que realizou unha revisión de gas fraudulenta “valéndose do engano, ao comunicarlle á vítima que facía seis anos que non se facía a mesma, cando fora realizada no ano 2020”. O individuo cobroulle a revisión fraudulenta e, ademais, apropiouse de diñeiro en efectivo que tiña no interior dun moedeiro, o cal se atopaba no interior dun armario da cociña. A persoa investigada en relación con estes feitos foi posta a disposición xudicial.

USURPACIÓN DE IDENTIDADE

Por outra banda, a Garda Civil imputou en calidade de investigado no termo municipal de Barreiros como presunto autor dun delito de usurpación de estado civil a un individuo que realizou a adquisición de dous terminais móbiles e servizos telefónicos a través dunha compañía de telefonía a nome dunha terceira persoa sen o seu consentimento. As mesmas fontes detallaron que, ao non cumprir coa permanencia adquirida tras realizar estas contratacións, a compañía penalizou á vítima cun cargo económico. Neste caso tamén a persoa investigada foi posta a disposición xudicial.