EFE | Axentes da Policía Local de Lugo desprazáronse a última hora da tarde de onte a un barrio da cidade despois de que un veciño alertase a través da sala operativa do 092 de que escoitara ruídos semellantes “a disparos dunha arma de fogo”.

Unha patrulla da Unidade Territorial de Policía de Barrio desprazouse de forma inmediata á Rúa Lavandeira, sobre as 18:55 horas, para estudar a orixe das mencionadas detonacións.

A policía non atopou ningunha arma de fogo, porque as detonacións que escoitara o veciño que chamou ao 092 eran provocadas polos petardos que estaban a explotar nun descampado próximo á estrada Nacional VI dous adolescentes, ambos de 15 anos.

Os axentes identificaron os dous rapaces e interviñéronlles unha caixa que contiña 25 petardos, dado que a súa venda está prohibida a menores de 16 anos.

Ademais, os policías investigaron a orixe deses petardos e confirmaron que foran vendidos nun establecemento comercial na Avenida da Coruña, de modo que denunciaron o responsable da tenda por vendérllelos.