Os bombeiros de Lugo manteñen as tarefas de control no polígono do Ceao para evitar posibles reactivacións dun incendio que se deu por extinguido doce días despois do seu inicio.
En declaracións aos medios este luns, a alcaldesa de Lugo, Lara Méndez, sinalou a existencia de controis preventivos na zona, que levan a cabo grazas ao “reforzo” do servizo de bombeiros para que unha unidade poida desprazarse ao lugar e realizar “controis ‘in situ’ de como evoluciona”.
Méndez recoñeceu que a situación foi “moi complexa” tras declararse o incendio na madrugada do domingo 11 de abril, cuxa orixe permanece baixo investigación. “Tendo en conta os elementos inflamables que existían pode haber algún conato de que se pode reactivar unha chama, polo que se seguen mantendo as medidas de control”, apuntou.
Nestes momentos, a alcaldesa acreditou que nalgunha nave arrincaron os labores de desecombro e nalgunha delas “empezouse a derrubar parte da súa estrutura”.
Lara Méndez lembrou que os empresarios afectados pódense acoller a axudas a través de calquera das “liñas abertas” polo Concello para a reactivación da economía, entre os que citou os plans ‘Reanima Lugo’ ou ‘Lugo Transforma’, este último dotado con 12 millóns de euros.
