A Policía Nacional de Lugo detivo unha parella que alugaba vivendas con documentación falsa e despois non pagaba a renda, un método de estafa que xa empregaran varias veces.

Segundo informa a Policía nun comunicado, esta parella de mediana idade e que non ten domicilio fixo enganaba a propietarios dos pisos cunha suposta minusvalía da muller e problemas familiares. “Unha vez logran convencer aos propietarios da necesidade da vivenda de maneira inmediata, comprométense a realizar os pagos o máis axiña posible mediante transferencias bancarias”, explica a Políca.

Así, achegan unha serie de documentos bancarios e persoais falsos, co que conseguen convencer os donos dos inmobles, pero posteriormente os propietarios non reciben ningún tipo de ingreso. Deste xeito, os propietarios han de iniciar o correspondente proceso de desafiuzamento para poder recuperar a súa propiedade.

Unha vez detidos foron postos a disposición xudicial por un delito de estafa. Quedan en liberdade á espera de xuízo.