A Garda Civil interceptou e propuxo para sanción a tres persoas localizadas en dous vehículos no concello de Vilalba por incumprir o confinamento polo estado de alarma. Os individuos alegaron que ían vender un dos coches para comprar un cabalo. Ademais, un dos homes pasa a ser investigado por un delito contra a seguridade viaria ao conducir sen ter o carné.

Segundo informou o Instituto Armado, os feitos sucederon o fin de semana durante un control establecido no quilómetro 41 da AG-64 (Ferrol-Vilalba). Os axentes procederon a identificar os ocupantes de dous vehículos que viaxaban dirección Vilalba. Nun dos coches ían dúas persoas nos asentos dianteiros, a pesar de non estar permitido iso durante o estado de alarma.

Ao seren preguntados sobre o motivo da circulación, todos eles argumentaron “de forma coincidente e sorpresiva” que se dirixían a Cospeito para vender un dos coches nos que viaxaban e, posteriormente, mercar un cabalo en Vilalba.

Posto que tal xustificación non se atopa dentro das excepcións á mobilidade, a Benemérita procedeu á súa identificación e proposta de sanción. Ademais, comprobaron que un dos condutores, veciño de Ferrol, carecía de permiso para conducir tras serlle retirado o carné no ano 2016.