O avogado das familias dos dous asasinados hai máis de 25 anos no coñecido como dobre crime do Cash Record, ocorrido no polígono lucense do Ceao, asegurou este mércores que o auto da Audiencia Provincial que ordena seguir coas dilixencias ao xulgado de primeira instancia que leva a investigación é como “unha xanela aberta” ao esclarecemento dos feitos.

Así, Gerardo Pardo de Vera sostivo que esta decisión é “unha xanela aberta dentro dun escenario bastante asfixiante para as familias das vítimas”, despois de que o xulgado que leva a instrución “dese por finalizada a investigación e rexeitase a práctica de dilixencias”.

Con iso, recoñeceu que as familias fiaran “todas as posibilidades a este recurso de apelación presentado ante a Audiencia Provincial”, e celebrou que o tribunal lle dese a “razón” en “todas as dilixencias” que solicitara.

“A pesar das limitacións derivadas do paso do tempo como recoñece a resolución, haberá que practicar esas dilixencias e ver que resultado arroxan. Oxalá teñan o seu froito”, incidiu.

En canto a que o auto resolva que se realizou unha “investigación errática”, Pardo de Vera sinalou que “nunca houbo unha vontade decidida de tirar dos fíos ata o final”.

“Hai unha serie de indagacións que quedaron a medio camiño e que nunca se soubo nin sequera porque non aparecen determinados documentos. Trátase de esgotar, dentro desas limitacións, que son moitas despois de tanto tempo, pero temos que esgotar esas vías para tentar decididamente esclarecer a verdade”, resolveu.

NOVAS DILIXENCIAS

No relativo ás dilixencias que deberá de practicar o xulgado que leva a instrución, o número un de primeira instancia de Lugo, debullou que se traducen en dúas cousas, “unha pista, que aparece un coche abandonado pouco despois do crime e que segundo unha testemuña moi fiable coincidía con outro que infundía moitas sorpresas o día do crime”.

“Aínda por riba, había manchas de sangue no vehículo, fíxose unha inspección ocular e non sabemos que ocorreu con todo aquilo, nin a Policía Local, nin o xulgado ordenaron esa dilixencia, nin a Policía Nacional dannos unha razón do resultado desa inspección”, explicou.

As outras dilixencias teñen que ver con “declaracións de testemuñas que aparecen desde o minuto un vinculadas co único imputado na causa hoxe en día”, e que se trata dun hostaleiro que tivo un local no centro de Lugo e que agora reside en Burgos.

O suceso producíase o 30 de abril de 1994, cando a irmá da caixeira abatida a tiros, Isabel López, se topou cos cadáveres de ambas as vítimas, a súa irmá Elena e tamén do repoñedor Esteban Carballedo, nunha nave de comercio almacenista situada no Ceao, onde desparecera a recadación dese día, sobre cinco millóns das antigas pesetas.