Unha muller sentará no banco dos acusados da Audiencia Provincial de Lugo a próxima semana (20 e 21 de novembro) acusada de apropiarse sen permiso da banca electrónica dun home que contrataba “de maneira habitual” os seus “servizos sexuais”, da que obtivo un total de 37.500 euros.

Tal e como recolle o escrito do Ministerio fiscal, a muller mantiña unha relación “de amizade íntima” coa vítima, xa que desde principios do ano 2020 el contrataba de maneira habitual os servizos sexuais da acusada, que exercía a prostitución.

“Aproveitándose desta relación de confianza”, a acusada fíxose coas claves da banca da vítima e realizou un total de 16 transferencias por valor de 37.500 euros a contas bancarias que previamente obtivera de terceiras persoas, e que, unha vez recibidas esas cantidades, entregábanllas de novo á acusada.

O home faleceu en febreiro do ano 2021 cando se atopaba xunto á acusada e sería en decembro dese mesmo ano cando foi detida e o xulgado de Monforte de Lemos acordou a medida de prisión provisional comunicada eludible baixo fianza de 5.000 euros, acordándose a súa posta en liberdade ao pór a fianza fixada.

Para a Fiscalía, os feitos narrados son constitutivos dun delito continuado de estafa informática e pide que se indemnice en concepto de responsabilidade civil aos herdeiros lexítimos da vítima polas cantidades defraudades na cantidade de 25.500 euros.